पूर्वराष्ट्रपति भण्डारीद्वारा कक्षा १२ मा उतीर्ण विद्यार्थीलाई उज्ज्वल शैक्षिक भविष्यका लागि शुभकामना

संवाद अनलाइन
२० श्रावण, २०८२

काठमाण्डौ । पूर्वराष्ट्रपति विद्यादेवी भण्डारीले हिजो सार्वजनिक भएको कक्षा १२ को परीक्षाफलमा उतीर्ण भएका सम्पूर्ण विद्यार्थीलाई हार्दिक बधाई तथा उज्ज्वल शैक्षिक भविष्यका लागि शुभकामना व्यक्त गर्नुभएको छ ।

उहाँले सामाजिक सञ्जालमार्फत विद्यार्थीहरूको परिश्रम, लगनशीलता र आत्मविश्वासको प्रतिफलस्वरूप प्राप्त यो सफलताले भविष्यमा अझ धेरै अवसरको ढोका खोल्ने विश्वास व्यक्त गर्नु भएको छ । उहाँले भन्नुभएको छ, ” तपाईँहरूको अथक परिश्रम, लगनशीलता र आत्मविश्वासको प्रतिफलस्वरूप प्राप्त यो सफलताले भविष्यमा अझ उत्कृष्ट अवसरहरूको ढोका खोल्नेछ भन्ने विश्वास लिएको छु ।”

त्यस्तै, अपेक्षित नतिजा प्राप्त गर्न नसकेका विद्यार्थीहरूलाई पनि भण्डारीले असफलतालाई अन्त्य नभई नयाँ सुरुवातको अवसरको रूपमा लिन आग्रह गर्नुभएको छ । निरन्तर अभ्यास, अटुट आत्मबल र मेहनतमार्फत भविष्यमा अझ उत्कृष्ट उपलब्धि हासिल गर्न सकिने उहाँको धारणा छ।

पूर्वराष्ट्रपति भण्डारीले शिक्षा जीवनको मेरुदण्ड भएको उल्लेख गर्दै विद्यार्थी भाइ–बहिनीहरूले ज्ञान, सीप र अनुशासनमार्फत आफ्नो जीवन उज्यालो बनाउने आशा व्यक्त गर्नुभएको छ ।

“शिक्षा नै जीवनको मेरुदण्ड हो भन्ने दृढ विश्वासका साथ विद्यार्थी भाइ–बहिनीहरूले ज्ञान, सीप र अनुशासनको माध्यमबाट आफ्नो जीवनलाई उज्यालो बनाउँदै लैजानु हुनेछ भन्ने आशा राख्दछु ।” पूर्वराष्ट्रपति विद्यादेवी भण्डारीले बताउनु भएकाे छ ।